Ek stem eenhonderdpersent saam dat God, wat vir ons net die beste wil, ons nooit sou wou belas met siekte,hartseer of dood nie. Ek stem ook saam dat dit alles die gevolg is van die gebroke wereld waarin ons leef. Al kan Hy al die ellendes waarmee ons gekonfronteer word, voorkom, laat Hy dit wel toe want dit is (hartseer, maar waar!) tog regtig die enigste manier waarop ons - veral in die geloof - kan groei. Die feit dat Hy dit wel in ons lewens toelaat, beteken egter nie dat Hy ons in die steek laat nie: net deur ons Here se krag en genade bly ons regop te midde van die pyn - soos sovele ouers wat al hul kinders aan die dood moes afstaan, kan getuig.

Ek glo ook dat God ons (die meeste mense, in elk geval) toerus met die wete van wat reg en wat verkeerd is, maar Hy sal nooit sy wil op sy kind afdwing nie. Hy sal egter wel sy koppige kind toelaat om soms die verkeerde besluit op sy lewensreis te neem; soos ons as ouers ook doen - maar anders as aardse ouers so dikwels doen, nie verklaar "Wel, jy het jou bed nou opgemaak; slaap maar self daar op!" nie. Vir Hom is dit maar net 'n ompad waarlangs Hy sy kind lei tot waar Hy in sy alwetendheid beskik het hy of sy moet wees... Daar waar die kind al sy gawes en talente die beste sal kan gebruik tot sy Skepper se eer!      

Dankie, ds Hannes! Vir my gaan dit daaroor dat God - as die Groot Argitek - jare voor mens se geboorte reeds weet wat presies Hy met jou lewe beplan: hoe Hy wil dat jy sy doel met jou lewe sal bereik. Daardeur lei Hy mens (soms deur plekke en situasies wat jy op daardie stadium nie kan verstaan nie) op sy tyd tot op 'n punt in jou lewe waar jy kan herken (en erken!) dat alles tog deel van die Groot Plan was. Natuurlik het Hy vir elkeen 'n eie wil gegee om te besluit; maar dat Hy jou daarna (al is dit met 'n draai) by sy bedoelde bestemming sal laat eindig, ly vir my geen twyfel nie...    

Ek het die afgelope tyd by 'n paar geleenthede gehoor en gelees hoe predikante en vooraanstaande akademici verklaar dat hulle nie glo God het 'n unieke plan met elkeen van ons se lewe nie.

Dit staan lynreg teenoor wat ek glo! Wat is jou siening hieroor?